كلامى

الحلم اصله فكره , و الفكره اصلها خيال , و الخيال اصله أمل

الخميس، 11 يونيو، 2009

أوبامـــا ..

"" السلام عليكم ""
هكذا بدأ الرئيس باراك أوباما خطابه للعالم الأسلامى وبالطبع أخد كل الحضور بالتصقيف الحاد .
وقد قام بخطف القلوب وأبهار العقول فى خطابه الذى جعل كل من شاهده يشعر بالارتياح وأن هناك أمل قادم وتغير للسياسه الأمريكيه تجاه الوطن العربى والمسلمين .. أمل تجاه المشكله الفلسطينيه .. أمل تجاه الحريه والديمقراطيه .
و كأن الله بعث لنا بأوباما ليحل جميع مشكلات الوطن العربى .
فرح المصريين بهذه الزياره التى يقال عنها تاريخيه فرحه كبيره جدا .. والسبب طبعا هو ان تم تجديد بعض مناطق من القاهره فى وقت قياسى .
وطبعا استغل البعض هذه الزياره وصنع ملابس وتحف عليها اسم اوباما .
فرحه المسلمين لم توصف عندما استشهد بالقرآن الكريم فى خطابه فهذه سابقه لرئيس أمريكى .
وأيضا استشهد بالأنجيل ولكن لم ينبهر الناس بما انه معروف عنه أنه مسيحى .
كان تعليق شيخ الأزهر على الخطاب " خطاب حكيم "
بينما تعليق البابا شنوده " نحن نريد أفعال لا أقوال "
الخطاب كان يرضى جميع الاطراف ولكن اخد عليه فقط ذكر مسيحى مصر بأنهم أقليه .

من جهه أخرى ... لا أعلم لماذا ولكن عندما نطق أول كلمه فى خطابه " السلام عليكم " تذكرت نابليون عندنا دخل مصر فى حملته .
باراك حسين أوباما من أب مسلم ولكنه هو مسيحى الديانه وهذا يعنى فى الشريعه الأسلاميه أنه مرتد عن الأسلام .
يأتى ويقول السلام عليكم و من الطبع لا يتوقع الا التصفيق الحاد له . و القرآن الكريم يجذب قلوب المسلمين أكثر فأكثر .
رحل باراك أوباما من مصر وهو على علم أنه كسب ملايين القلوب بها .
ولكن هل صدق المصريون أن أوباما مهتم حقا بقضيه نظره الغرب للأسلام وكل ما تم الاحساس به من هذا الخطاب التاريخى .
باراك اوباما سياسى بحت وفوق ذلك كان محامى وما أقصده انه على درايه كامله بمصلحته ومصلحه بلده وهو يسخر جميع الاشياء لخدمته .
ولكن هذه المره ليس بالقوه والحرب ( فبالطبع رأى كره الشعب الأمريكى لبوش بعد حرب العراق ) أنما بالكلام والخطابات الرنانه .
فهذه هى سلاحه وبالطبع هو جيد جدا فى ذلك .

خرج اوباما من مصر ويعتقد الكثير أنه مهتم بقضيه فلسطين .. ويمكن ان يكون لها حل قريب .
وجد فيديو بالصدفه لكلمه الرئيس الأمريكى للجنه الشؤون العامه الامريكيه الاسرائليه .
تكلم فى هذا الفيديو عن أرهاب حماس وموقفه الشخصى السلبى تجاهها .
تكلم على أن يجب توقف مصر عن تهريب السلاح لفلسطين .
تكلم عن قدس اسرائليه كامله وليس حتى مناصفه بين الاسرائلين والفلسطنين .
تكلم عن دعمه المادى للأسرائيل وعن تسليحها .








video

السبت، 18 أبريل، 2009

أخر مره أسافر فى ميكروباص ...





أيه الشئ العجيب اللى ممكن يخليك أن دى أخر مره هتركب فيها ميكروباص وان نهايتك على الطريق ده وانت مسافر .

1- لو صاحبك اللى المفروض جاى معاك مجاش وموبيله مقفول ( بعد كده الناس هتقول ياااااه لسه له عمر علشان كده مركبشى معاه )
2- أن يكون السواق لسه صاحى من النوم ومش شايف قدامه 2 متر .
3- لو بقى نفس ذات السواق ده أصطبح بسيجاره حشيش ولا حاجه علشان يفوق كده ويبقى تمام .
4- لو الركاب محدش فيهم اتشاكل على الأجره وطلع بقيت الميكروباص ناس حراميه .
5- لو قعد بقى جنب نفس ذات السواق الصاحى من النوم والمصطبح واحد صاحبه ومعاه ابنه او بنته الصغيره وعمال يلعب مع عمو السواق .
6- لو كنت مسافر على اى طريق داخل جمهوريه مصر العربيه .

الأربعاء، 15 أبريل، 2009

حكاوى زمان

كثيرا ما يسمع المرء وهو صغير حكاوى وحودايت من والديه

ولكن حكايه من لم نراهم يكون لها طابع خاص فى أذهاننا

نريد أن نعرف كيف كانوا وما هى صافاتهم ونحب أن نرى صور لهم ونتخيلهم وكأنهم إذا كانوا معنا لحلوا كل المشكلات التى نتخيلها .

من الممكن ان يرجع ذلك إلى أن من يتلو حكاويهم يختار دائما أن يظهروا بأفضل صوره وكأنهم أفضل من كان فى هذا العصر ويمكن أن يكونوا أفسد من عاش فيه .

أتحدث عن حكاوى الأجداد .

من منا لم يريد ان يرى أجداده ويعيش معهم .. كثيرا فعل ولكن قليلا لم يكتب له ان يرى اجداده ويكتفى بالانصات إلى حكاويهم المميزه دائما .

- ماما هو فين جدى ؟

- جدك الله يرحمه مات من زمان .

- زمان أمتى يا ماما ؟

- من قبل ما أتجوز بابا .

- هو جدى كان عامل أزاى يا ماما ؟

- ياااااه كان طيب اوى اوى وكان يعرف ربنا اوى وكل الناس اللى فى الشارع كانت بتيجى تسأله لو معرفوش حاجه فى الدين ( تصمت قليلا ثم بتبسم أبسامه جديده وتقول ) كفايه أنه مات وهو بيبتسم ووش منور والاوضه كلها ريحتها أتقلبت بخور .

- يا ريتنى كانت شوفت

تزداد الأسئله كل يوم ولكن لا تتغير الاجابات كثيرا وتنطبع صوره دائمه أن هذا الجد كان ولى من أولياء الله فى الأرض ويمكن كان كالشيخ الشعرواى ولكن لم يعرفه الناس .

- بابا هو فين جدى ؟

- جدك عند ربنا بس بتسأل ليه ؟

- هو مع جدو التانى يا بابا مات برضوه .

- هو مات اه بس معاه بقى ولا مش معاه الله أعلم ربنا اللى عارف مش انا .

- هو مات أمتى يا بابا من زمان برضوه قبل ما تتجوز زى جدو التانى ؟

- لا هو مات قبل ما نخلف أنا وماما وكان بيجى يزورنا كتير وبيحب يقعد معانا.

- هو جدو كان عامل أزاى يا بابا ؟

- جدك .. ( يقول فى شبه سعاده ) جدك كان راجل ملهوش زى .

كان غنى اوى وعنده مصانع كتير جدا كان أياميها أغنى واحد فى البلد كلها .

أول من جاب عربيه عندنا هنا و أول من جاب تلفزيون حتى الناس اللى كانت

بتيجى تزورنا كانوا بيخافوا منه ويفتكروه فيه عفاريت .

- أمال الفلوس دى كلها راحت فين يا بابا مش جدو مات واللى بيموت ابنه بياخد فلوسه .

- ( بحسره مكتومه ) اه يا سيدى بس جدك كان عنده عيب كبير أوى , كان بيحب يتجوز كتير , كان متجوز تلاته . وأخر واحده اتجوزها خرب بيته وخلته يقعد من الشغل ويبيع كل حاجه كانت عنده وخسر كل حاجه .

- يا ريتنى كنت شوفته

ينطبع فى الزهن حكاوى هذا الجد التى لم تنقطع يوما وصوره لباشا من البشوات ذو الطرابيش والبدل والوقفه التى لا تدل إلا على العظمة .. هذا هو خير الجدود أعرف أنه لو كان رأى أحفاد له لطلق هذه المرأه وأعطى كل ما يتلك أليهم ليعيشوا سعداء إلى الأبد .

صعب على الصغير أدراك ماهيه الموت وما هو معنى الفراق حتى يمر بهذا المعنى حتى يدرك ان الموت هو أنه لم يرى ذلك الشخص مهما طوال ما بقى حى

سمع عن اموات ولكنه لم يتاثر فمن أين له أن يعرف معنى الفراق من افراد لا تربطه بيهم ألا مجموعه من الصور والحكايات .

- ماما . . . أحنا فين يا ماما ؟

- أحنا فى الترب .

- مش الترب دى بتاع الميتين يا ماما ؟

- أيوه هى دى .

- هو مين اللى مات يا ماما ؟

- ( لا إجابه )

- دا خالاتى هما كمان عند الأوضه اللى هناك دى .... وبابا هو واعمامى وعماتى هناك كمان أهم ......... أمال فين تيته يا ماما ؟

- (دموع تتساقط من تحت النظارات السوداء ) نايمه فى العربيه اللى هناك دى.

- وليه تنام فى العربيه ........ أحنا هنا ليه يا ماما ؟؟؟

- (لا أجابه )

- تيته نايمه هنا ليه ؟ وأحنا هنا ليه يا ماما ؟

- ( لا إجابه )

- تيته نايمه هنا ليه ؟ وأحنا هنا ليه يا ماما ؟

- علشان ماتت .

يصمت الجميع فى حين تعلوا أصوات أخرى جديده ولكن يستمر صمت النفوس طويلا .

الخميس، 9 أبريل، 2009

موسم " 6 إبريل "



6 إبريل 2009
أضراب عام ... من أجل مصر

ياااااااااااه شوفت الجمله دى كتير جدا الشهر اللى فات ده .
أنتشرت انتشار قوى جدا على النت وفى الشوراع وفى الجامعات " طبعا بعد ما بيتوزع الورق مش بنشوف اللى كانوا بيوزعوا دول تانى بس مش عارف ليه " .

اللى لفت نظرى اكتر بقى ان كل الناس كتبت عن موضوع الاضراب ده
فى المدونات وفى المواقع والفيس بوك وحتى على الماسينجر .
مش عارف ليه ساعتها جه فى دماغى حاجه واحده بس ..... حصه التعبير فى المدرسه .
افتكرت لما كان بيجى اى موسم تقوم أبله العربى قايله أكتبوا عن الموسم ده .

- شم النسيم .... تتفتح الأزهار والورود وبدايه الربيع ونذهب الى الحدائق .
- الحج وعيد الاضحى ..... يذهب ابى الى الحج لايقامه فرض الله بينما أخى الكبير يقوم بالذبح الاضحيه مثلما كان يفعل سيدنا ابراهيم .
- 6 أكتوبر .... استطاع جيشنا المغرار ان يهزم العدو شر الهزيمه والفضل كل الفضل لصاحب الضربه الجويه الاولى .

المره دى بقى حسيت ان الموضوع بقى مشابه لكده

- 6 إبريل ...... الحكومه بنت تيييييييت والريس كمان وهناخد حقنا يعنى هناخد حقنا والاضراب مسموح بيه وسمعنى سلام الحزب الوطنى .

فجأه تلاقى كل الناس مش عاجبها الوضع وكل الناس بتشتم فى الحكومه وكل الناس بقى عندها روح أيجابيه وعايزه تكسر الدنيا .
طيب يعنى الناس دى محستشى ان الوضع غلط الا قبل 6 إبريل بس .

ولا هو مجرد بقى موسم للتعبيرعن الغضب .


السبت، 21 مارس، 2009

أحساس غبى جدا

أحساس غبى جدا
أحساس كله يأس وفراق لأى ذره أمل جوه الأنسان .
يخليك عايز تهد كل حاجه بنيتها وتدعى يا ريتها ما كانت تحصل .
يخليك تحب الوحده وتعشقها وتكره اللى يقولك محتاجك خليك معانا .
لما تحس انك عربيه من غير عجل أو كتاب له عنوان جميل ومفهوش ولا سطر .
لما تحس أن وصلت لمرحلت أنك مش عارف تعتمد على حد .
ويبقى أصعب لو كنت خلاص أتعودت على أنك تشتغل مع ناس ووسطهم ومعتش لوحدك ومش عارف تتخلى عن ده .
ويبقى أصعب لو بقى عندك مليون سبب يمنعك من أنك تبقى وحيد أو تعلن رايه الأكتئاب لفوق وتعتزل كل حاجه .
يمكن زمان كان أقوى من كده لما كان وحيد ومجربش الشغل وسط الناس .
يمكن زمان كان يقدر يكتأب ويرمى الدنيا وكل اللى فيها لما كان لوحده فى الدنيا قبل ما يرتبط حزنه وسعاده بحد تانى .
كلام تسمعه من الناس يحمسك ويفرحك ويخليك عايز تهد الدنيا وتعمل المستحيل علشان الناس دى .
كلام يهدك انت وتعرف أنك لسه لوحدك بعد كل ده و أنت ولا فارق مع أى حد .
أعذار بتسمعها وتصدقها وتنام وتقول هصبر واعتذار عمره ما فارق لسان .
اعذار بتسمعها تخليك زى البركان وحاسس أنك كنت اعمى وأول مره تشوف الناس .
شاف ناس حماسها بجبرك متقولشى لأه ولو طلببت منهم أيه هيتنفذ .
شاف نفس الناس معدتشى فارقه معاهم أى حاجه وطلع كان كلام مكتوب بتاشير شفاف على سبوره .
بس هو حلمه بقى أكبر منه ومن كل اللى معاه ومش هيقدر يسيبك علشان أول قاطع طريق .
بس هو عرف فين الصح ومين اللى هيكمل وياه واكيد أتعلم بس مش متأكد أنها مش هتتكرر معاه .

السبت، 7 مارس، 2009

الشرطه فى خدمه طراطير الشعب




السلام عليكم
كل سنه و انتوا طيبين بمناسبه المولد النبوى الشريف
وكلنا اكيد جبنا حلاوة المولد ونقعد ناكل فيها لحد ما سننا تقع زى كل سنه .
والعيال كمان أكيد هتروح تجيب الطراطير اللى بتلمع دى وتلبسها
بس مش عااااااااااارف ليه
من وأنا لسه عيل صغير وأنا بكره حاجه اسمها طراطير وبحس اللى بيلبسها دى مش بيبقى راجل اوى يعنى .
وبكرها بكرها يعنى .
وبكره اللى بيبعوها كمان .
ناس غريبه كده تلاقى الواحد منهم لابس ميت طرطور على راسه وعمال يزمر ببتاعه كده ويزل العيال الصغيره علشان يشبطوا ويدبسوا اهلهم ويجيبولهم واحد .
وكل بياعين الطراطير دول ليهم صفه مشتركه ... ( لا لا طبعا غير الغتاته والرخامه )
العربيه اللى بيبقى عليها الطراطير دى .
عباره عن قفصان عيش مسروقه من الفرن اللى تحت بيتى وبشكل عجيب طالع ليهم 4 عجلات صغيره .

المهم النهارده نزلت اتمشى شويه فى الشوارع أنا وأصدقاء السوء .
لقيت بقدره قادر شارع كامل اتحول الرصيف بتاعه من رصيف ناس تمشى عليه لمصنع طراطير .
اه والله بجد ... بتاع 6 ستات وكام راجل كده فارشين على الرصيف وقاعدين يعملوا فى طراطير .
أنا أول ما شوفت كده قولت استر يا رب امال لما ادخل جوه البلد بقى هعمل أيه .
المهم و أنا ماشى كده ورايح على شارع البحر ( وشارع البحر ده اكبر شارع عندنا يعنى ) سمعت أن فيه حمله من بتوع المرافق دلوقتى وهتشيل كل الناس دى .
قولت أحمدك يا رب .
أخيرا هشوف الشارع ده من غير بياعين وبلالين ولا طرااااطير ويبقى منظر حضارى رائع .
قولت بقى اما ادخل اشوف الناس دى علشان أشمت فيهم شويه وهما بيتجابوا من قفاهم والحاجات دى تتصادر منهم .
وبعدين عادى اصلا دى عربيه بتنين جنيه الا تلت
وكام طرطور الخمسه بربع جنيه ..... يعنى اكيد الناس دى مش هتموت من الجوع لما دول يتاخدوا .
ودخلت الشارع ويا ريتنى ما دخلتوا .
لقيت كام عسكرى ولا شاويش ولا احتمال يكون مخبر متنكر فى هيئه امين شرطه .
أنا قولت بس دول نزلوا اهمت وبيشتغلوا بقى وهشوف الناس وهى بتبهدل بقى .
لقيت على حين فجأه الناس دى كل ما حد من العساكر دى يقرب منها شويه يقوم داخل شارع جانبى .
ومحدش من العساكر دول بيتكلم خالص وسايبنهم .
انا حسيت ان فى حاجه مش تمام فى الموضوع ... مش دى شرطه المرافق اللى اتعودنا عليها فقربت منهم بقى أشوف ايه الموضوع .

لقيت العساكر ولا الكام شاويش دول بيقولوا للناس دى ايه بقى : " يلا يلا قوم من هنا الحمله جايه دلوقتى , قومى يا بت لو العربيه جات وانتى لسه هنا وحياه مامتك ( مامتك دى انا بحاول ابقى مؤدب ) ما هتشوفى حاجتك دى تانى "

انا فضلت واقف متنح كده فى الشارع مش فاهم حاجه .
الله .. مش دول مرافق .. والجاين مرافق
ايه مش عايزين يسترزقوا ولا أيه ؟!
قام واحد من اصدقاء السوء اللى معايا قايلى : " أيه يا عم أصلهم واكلين قبل المولد كويس "
طبعا انا فهمته ورديت عليه قولت " فعلا الشرطه فى خدمه طراطير الشعب "

الخميس، 5 مارس، 2009

لازم تحضروا

ندوة صالح نفسك للدكتور / محمد أبو فرحة - ضمن فعاليات مهرجان طور نفسك - مهرجان التنمية البشرية الأول بجامعة المنصورة

التنمية البشرية علم الحياة, من أين يبدأ الإصلاح
هدفنا في الحياة, غيّر الصورة
مشوار الألف ميل يبدأ بخطوة, هل هدفك واقعي؟
كن رئيسًا في حياتك, هل أنت رحمة للعالمين
النظرة الإيجابية, اصدق مع نفسك
لست عاجزًا, هيلين كيلر... لماذا نجحت؟
الإصرار سر النجاح, غير طريقتك القديمة

مع الدكتور / محمد أبو فرحة

أول من قام بتدريب الشفرة الجديدة في البرمجة اللغوية العصبية في مصر, حاصل علي العديد من الدبلومات في مجالات علم النفس والتسويق والمبيعات والتنمية البشرية , خبير واستشاري في المعاملات الدولية والتنمية البشرية , صاحب العديد من البرامج التلفزيونية في العديد من القنوات الفضائية, له أكثر من ثلاثين برنامجًا من البرامج التدريبية المسجلة باسمه، مثل: الخطوة الأولى – جسور الثقة – صالح نفسك – اصنع حياتك – 7 أسرار لتصبح مليونيرًا – أسرار لا تعرفها النساء – أطلق عنان خيالك – علّم
– إعداد وتطوير الأئمة والدعاة والمحاضرين ....

الأحد : 8 - مارس 2009
مدرج الفرقة الإعدادية - كلية الصيدلة
الساعة الرابعة عصرآ

بجد يا جماعه الراجل ده يستحق ان الكل يحضر له
وان شاء الله مش هتحس انك ضيعت وقت معاه وهتستفيد بجد

الأربعاء، 25 فبراير، 2009

القراءة للمعاقين .....!


كنت من كام يوم كده مع واحد صاحبى فى قهوه وكنت سالف منه كتاب وقولت أرجعهوله بقى ( صاحبى ده من نوع الناس اللى هما دودة قرايه ) .
المهم قعدنا وقلت أغلبه عشره طاوله بقى و احنا قاعدين لقيت الراجل اللى بينزلنا المشاريب مسك الكتاب اوى كده وبص على صاحبى ده وقاله " ماشى يا عم المثقف " طبعا أنا اخد الموضوع عادى فى الاول لان الناس دى بتحب تهزر مع الزباين ويمكن دى طريقه تهريجه .
لكن لقيت صاحبى بقى بصراحه مفروس من الكلام ده .
قالى الجمله دى انا طول عمرى بسمعها من الناس ولو فى يوم صدف ومشيت بكتاب فى الشارع كل واحد يقابلنى يمسك الكتاب يقلب فيه ويقولى " ماشى يا عم المثقف " والموضوع ده يا أبو نشأت خانقنى أوى .
ساعتها أنا بقى قعد أفكر هما ليه الناس دى بتعمل كده , هل يا ترى مثلا الأنسان اللى بيحب القرايه ده بيبقى حاله شاذه عن المجتمع .
الله دا اول كلمه فى القرآن الكريم " إقرأ " .. معنى كده إن القرايه من حرام .
آمال الناس بتبص لأى حد ماسك كتاب غير بتوع الدارسه أنه معوق ليه .
أفتكر بعد ما سيبت صاحبى ده بقى رحلتى الطويله مع القرايه واللى انتهت بحلول بعبع "الثانويه العامه " كفاكم الله شرها , انا فاكر انى كنت بحب أقرى وانا صغير وبحب القصص جدا ( طبعا اللى كانت بفهمها اياميها ) , بعد كده وفجأه لقيت ان ابقى ماسك كتاب فى ايدى غير كتب ومذكرات المدرسه شئ حراااام ... أيوه حرام ومن الأقوال المأثوره أياميها بقى " مذاكرنك أهم " " طيب افلح الأول فى مذكرتك وبعدين امسك الكتب دى " " فى الأجازه اقرى زى ما انتا عايز بس دلوقتى ركز علشان تبقى حاجه " ( وطبعا الاجازه لما بتيجى بيبقى اسبوع مصيف وبعديها نبدا الدورس بقى )
ولو الحجج خلصت هتلاقى أشهر كلمه قدامك اللى بجد تحسس الواحد أنه مش بنتى أدم وملهوش الا وظيفه واحده .. " يا تذاكر يا تنام "
وكمان افتكرت انى فضلت أربع سنين ممسكتش كتاب الا كتب الدراسه . لانى طبع مكنتش متحمس اوى يعنى علشان ارجع اقرى بعد 3 سنين القرايه حرام فيهم .
المهم سرحت بقى بخيالى بعيد كده بقى وفكرت أن لو فيه واحد حابب يبقى أديب مثلا أو يبقى شاعر أو يكتب قصص هتبقى أيه ظروفه ده بقى ؟
تخيلوا كده معايا لو راح لأبوه يقوله أنه بيحب الكتابه وكتب حاجه وعايز يطبع الكتاب بقى , هيبقى أيه تصرف أبوه بقى .
- صباح الخير يا حاج .
- صباح الخير يا اخويا انتا صحيت ؟
- ( لا بمشى وانا نايم ) أيوه يا بابا وصليت الصبح كمان .
- طيب يا سيدى ربنا يهدى .
- كنت عاوز اقولك على موضوع كده يا حاج .
- أوعى تقولى هات فلوس أنا يدوب ممشى البيت بالعافيه . لا تقولى هات جزمه ولا شورت ألعاب حتى .
- لا يا حاج دا الموضوع أكبر من الجزمه والحاجات دى .
- تبقى عملت مصيبه أتحفنى اطرب ودانى .
- أحم .. أنا عاوز انشر كتاب .
- طيب ما تنشر وأنا مالى أن شاء الله , لو البلكونه مش عجباك عندك السطح بس خلى بالك من الفراخ لتهرب .
- ( الاستهبال بدأ بقى ) لا يا حاج عاوز أطبع كتاب يعنى .
- والكتاب ده بتاع مين بقى أن شاء الله ؟
- بتاع مين أيه يا حاج أنا اللى مألفه .
- لا يا شيخ وهو أنتا بتعرف تالف ؟ وألفته امتى ده بقى ان شاء الله ؟ وألفته أزاى ؟
- انا بقالى يا حاج 3 سنين بكتب فى حاجات أخيرا جمعتها ونفسى أنشرها فى كتاب بقى , وبعيدن أنا مخلص فلوسى كلها أصلا على الكتب من وانا فى ثانوى .
- يعنى كمان سايب مذكرتك طول السنين ده وعمال تقرى فى كتب بره , والفلوس دى انتا مش بتشرب بيها سجاير .
- لا يا حاج والله ما جربتها حتى سجاير ايه بس .
- طيب ربنا يهديك يا ابنى . اكيد طبعا القرايه حاجه مهمه انا طول عمرى معودك على كده .
- ( لا يا راجل ) ايون ايون يا حاج طبعا , المهم بقى أنى عايز انشر بقى الكتاب بتاعى ده .
- طيب خلاص روح أنشره زى ما انتا عايز , وربنا يكرمك .
- ربنا يخليك يا حاج انا أن شاء الله هروح اتفق مع دار النشر النهارده . هى الفلوس هتبقى جاهزه امتى بقى يا حاج ؟ علشان يمكن اخلص كل حاجه النهارده .
- نعم يا حبيبى فلوس ايه ؟
- فلوس طبع الكتاب يا بابا .
- انا مش طول عمرى بقول ان الحاجات دى هتبوظك غور ياض من قدامى الساعه دى .
- يا حاج دا انتا اللى عملتنا ان القرايه مهمه اوى .
- مهمه اه بس مش جايبلى شويه حاجات تافهه وتقولى انشرها . انا مش قولتلك أمشى ياض .

ويمكن ساعتها البلكونه تتفتح وتلاقى ناس بتطير منها كده وقسم البوليس يسترزق .
طيب لو ده موقف الاب بقى تخيلوا انتوا بقى لو الولد ده راح يتجوز مثلا هيبقى ايه منظره . ( أنا عن نفسى مش عايز أتخيل ) .

والظاهر ان الموضوع ده مش جديد ولا حاجه وأنه قديم أوى .
بدليل حمله القراءة للجميع اللى ظهرت اصلا علشان تنبه الناس بأهميه القرايه .
بس انا بصراحه كل ما أفتكر القراءة للجميع دى أفتكر الكتاب اللى كنت واخده من إبن خالتى . الكتاب كان المفروض للأطفال .
الكتاب عباره عن قصه وكان عنوانه " عالم رائع جديد " والكاتب هو " الدوس هيكسلى " . والثمن مائه خمسه وسبعون قرش .
الكتاب ده كان عندى من وأنا فى ابتدائى ... قريته ومفهمتش حاجه خالص .
استنيت لحد ما بقيت فى اعدادى .. قريته ومفهمتش حاجه خالص برضوه . الله .. دا كان المفروض للأطفال .
لحد ما زهقت منه بصراحه وقولت ده فيه حاجه غلط .
لحد وانا فى تالته ثانوى بقى وكنت قاعد كده عند استاذ محمد محسن استاذ العربى ومستخبى لحسن ياحد باله منى ويسألنى ولا حاجه .
لقيته بيقول فى وسط الكلام " ومن رواد اليوجينيا الدوس هيكسلى " ... أيه ده دا الراجل بتاع الكتاب الغبى , قومت مركز كده بقى
عرفت ان ده درس قراءة عندنا فى المنهج و " اليوجينيا " دى حاجه زى التفرقه العنصريه وهى أن فيه فئه واحده بس من الناس اللى تستحق انها تعيش والباقى يخدموهم .. الله بقى دى زى النازيه تقريبا اصلا هى دى .
الراجل ده بتاع الكتاب من اهم روادها ... أفتكرت ان القصه كان فيها حضانات اطفال فى المستقبل وانهم بينقوا الصفات بتاع العيال دى .
يعنى كده القصه دى بتخدم اليوجينيا .. والقصه دى اطبعت فى حمله القراءه للجميع .. و للاطفال كمان . دا كده دى مصيبه .
أذا محدش بيعترف أن الانسان اللى بيحيب القرايه ده أنسان طبيعى على الاقل .
ولو حتى جهه اعترفت بده بتديله حاجات تخليه مش طبيعى .
ٌإذا وبكل فخر القراءة للمعاقين .

الجمعة، 13 فبراير، 2009

الأعتراف بالحق فضيحة ..!




بقالى فتره طويله بقول الجمله دى " الأعتراف بالحق فضيحه " وكنت بقولها بهدف التهريج والهزار بس مش اكتر .
قريب بس فكرت فى معناها .
... " الأعتراف بالحق فضيحه " ...
أيه ده تصورا بجد . هو فعلا ان الواحد يقول الحق بقت فضيحه دلوقتى ؟!
امال الحاج اللى قال أن " الاعتراف بالحق فضيله " ده كان ايه .
يمكن نظرته اللى على قده مصورتلهوش ان ممكن يجى ايام زى اللى احنا فيها دى .
يعنى ايه .. بجد خلاص معتشى الاعتراف بالحق فضيله وبقت فضيحه والسكوت عن الحق و انك تبقى قادر على التضليل هى دى الفضيله اللى بجد و المجتمع كله يحترم الإنسان علشانها .
علشان كده الناس المحترمه زادت أوى فى مجتمعنا ده .
بجد نفسى فى يوم الأقى مسؤل طالع على أى قناه فى التلفزيون ان شالله حتى موجة كوميدى ويقول يا جماعه أنا غلط فى الموضوع ده أو اللى بيحصل ده ناتج عن تقصير منى .
اعتقد بجد ساعتها الناس ممكن تحترم المسؤل ده هو اه قصر فى واجبه ومسؤليته بس اعترف بتقصيره ده وأكيد مدام اعترف هيحاول يتجنب الموضوع ده تانى .
ولو حتى الناس محترمتشى المسؤل ده اهو على الاقل خلص زمته قدام ربنا .
نفسى اسمع فى يوم ان عندنا مسؤل اتحرق دمه زى ما دمنا كل يوم بيتحرق وقرر أنه يستقيل بس علشان شاف نفسه مش فى أيده حاجه يعملها .
لكن الكلام ده ممكن يحصل فى حاله واحده باين كده وهو ان أنا اكون بحلم .
أكيد كلنا شوفنا "س . ح . م " وكمان حفظنا الأختصارات دى , وهى اختصارات لسكك حديد مصر الموقره .
واللى بصراحه بتوحشنا كل يوم ... لان طبعا بتقل كل يوم من كتير القطارات اللى بتنقلب .
والسيد وزير المواصلات اللى كل الناس فى كل البرامج بتاعت الوصله قالت عاوزين نشوف استقاله بقى
بس طبعا السيد الوزير معندوش وصله علشان كده معرفشى الكلام ده .

وبرضوه اكيد سمعنا عن اكياس الدم الملوثه وبرضوه نفس الناس بتوع الوصله دول قالوا عاوزين استقاله بقى .
لكن برضوه عادى جدا ولا أى حاجه حصلت .

واكيد برضوه سمعنا عن حاجات كتير اوى زى الاكل المسرطن اللى اكلناه وهضمناه وبالهنا والشفا .

عمرى ما شوفت مسؤل طلع وقال العيب منى يا جماعه ولا الغلط أنا السبب فيه .
طيب يا ترى بقى هو خايف يقول كده ليه .
يعنى ممكن مثلا حد يقول عليه مسؤل فاشل كل اللى جم قبله محدش فيهم غلط نص غلطه (طبعا كانوا شغالين بنفس المبدأ بتاع الاعتراف بالحق فضيحه ) .
ويبقى فعلا فضيحته بجلاجل وسيرته على كل لسان .. علشان معاليه غلط وقصر فى حاجه .
استغقر الله العظيم إنسان مين بس مبيغلطشى .

ٌإذا فبجد الاعتراف بالحق فــضــيـحه .