كلامى

الحلم اصله فكره , و الفكره اصلها خيال , و الخيال اصله أمل

الجمعة، 21 يناير 2011

كل اللي فات وطن و كل اللي جاى وطن تانى خالص ...



أخر مره كتبت فيها .. أو فكرت أكتب فيها
كانت قبل أنتخابات مجلس الشعب  , بصراحة جالي أحباط وطني من المرحلة التالته .
كانت أول مره أنتخب فيها  و تخيل ولا كأنى مروحتش .
مشكلة الأنتخابات أن الناس بتشوف الظلم بعنيها و تبقى كل حاجه عالمكشوف .
هتشوف التزور إذا كان صريح  أو مستخبى  الأتنين مفضوحين .
هتشوف المعارضه بتتعامل ازاى جوه اللجان و هتشوف الحزب بيتعامل أزاى
و مش هتشوف الاخوان فى اللجان اصلا .
الموضوع مكنشي سهل المره دى  .
ولأن مكنشي حد هامه حاجه
كليبات التزوير اللي على النت
النتيجة بتاع الأنتخابات
حتي الاعادة .
لا كده كتير  .. كده مش طبيعى 
دا كده فُجر .
وا كأن فيه 80 مليون ليهم حق و لا كأن فيه أحزاب
ولا كأن فيه ديمقراطية  .. وكله بان على حقيقته .
و أنا لو حبيت أنسب الأفكار دى كلها  ملقيش أحسن من " أحمد عز " .
بعد ما فضلت كتير مُحبط وطنياً .
لقيت و إذ فجأه حادث كنيسة الأسكندرية .
حادث إرهابي   ... أيوه
دينا يمنعه        ... أيوه
مات فيه مسلمين و مسيحيين  ... أيوه
كان المفروض يبقي بداية فتنه أهلية  في مصر ... أيوه
و ده مش هيبقى كويس ليا ولا لأهلى و لا لأصحاب   ... أيوه

بس  ... و أنا مالي
هو أنا ليا صوت ؟
هو أنا جزء من موطن ؟
هو أنا ليا وطن ؟
طب أنا أخاف على أيه  أذا مكنش ليا فيه .
و أغير صورة بروفايلى و أنزل الكنيسه الساعه 12 ليه ؟
ولا حتى أنزل مظاهره ليه ؟

ولا هو الوطن ده واخدنا مصلحه
لو لينا حق عنده يبقى ولا كأنه يعرفنا
و أتنين تلاته يقرروا مصيرنا .

و لما يتزنق يجيبلك ورد وفل و يقولك تعالى شارك .
ونلاقى برامج كل القنوات و بالأرجوزات بتاعهم .

ليه قبل كده صوتى مكنشى له قيمه و دلوقتى صوتي مهم .

أفتكر الدنيا متمشيش كده ..

و أدينا مستنين يوم 25 يناير و نشوف ايه اللى هيحصل 

هناك 5 تعليقات:

  1. الأول عايزة أقول إن العنوان حلو أوى...شدنى على هنا على طول..
    ثانيا لأ احنا لينا فيه و أكتر من أى حد تانى..
    و على كل اللى قولته ده ليه رد واحد..كل واحد و ليه يوم..و تونس تشهد..

    ردحذف
  2. شكرا على المرور

    و ربنا يكرم :D

    ردحذف
  3. عجبنى جدا الموضوع
    و الاسلوب شدنى
    و ادينا مستنيين يوم 25 يناير و نشوف ايه ال حيحصل

    ردحذف
  4. موضوع مميز جداً و كلامك مظبوط...
    و ربنا يستر يوم 25 ...

    ردحذف
  5. السلام عليكم ازيك يا محمود يا صديقى العزيز موضوعك ميز واكيد كلنا عشنا اللحظات دى معااك ولكن يبقى الامل وياريت كلنا ننزل يوم 25 يناير كدعوة للصراخ واعلان الوجع سلاااااااااااااااااامى

    ردحذف

ما يلفظ من قول إلا لديه رقيب عتيد