كلامى

الحلم اصله فكره , و الفكره اصلها خيال , و الخيال اصله أمل

الخميس، 9 أبريل، 2009

موسم " 6 إبريل "



6 إبريل 2009
أضراب عام ... من أجل مصر

ياااااااااااه شوفت الجمله دى كتير جدا الشهر اللى فات ده .
أنتشرت انتشار قوى جدا على النت وفى الشوراع وفى الجامعات " طبعا بعد ما بيتوزع الورق مش بنشوف اللى كانوا بيوزعوا دول تانى بس مش عارف ليه " .

اللى لفت نظرى اكتر بقى ان كل الناس كتبت عن موضوع الاضراب ده
فى المدونات وفى المواقع والفيس بوك وحتى على الماسينجر .
مش عارف ليه ساعتها جه فى دماغى حاجه واحده بس ..... حصه التعبير فى المدرسه .
افتكرت لما كان بيجى اى موسم تقوم أبله العربى قايله أكتبوا عن الموسم ده .

- شم النسيم .... تتفتح الأزهار والورود وبدايه الربيع ونذهب الى الحدائق .
- الحج وعيد الاضحى ..... يذهب ابى الى الحج لايقامه فرض الله بينما أخى الكبير يقوم بالذبح الاضحيه مثلما كان يفعل سيدنا ابراهيم .
- 6 أكتوبر .... استطاع جيشنا المغرار ان يهزم العدو شر الهزيمه والفضل كل الفضل لصاحب الضربه الجويه الاولى .

المره دى بقى حسيت ان الموضوع بقى مشابه لكده

- 6 إبريل ...... الحكومه بنت تيييييييت والريس كمان وهناخد حقنا يعنى هناخد حقنا والاضراب مسموح بيه وسمعنى سلام الحزب الوطنى .

فجأه تلاقى كل الناس مش عاجبها الوضع وكل الناس بتشتم فى الحكومه وكل الناس بقى عندها روح أيجابيه وعايزه تكسر الدنيا .
طيب يعنى الناس دى محستشى ان الوضع غلط الا قبل 6 إبريل بس .

ولا هو مجرد بقى موسم للتعبيرعن الغضب .


هناك 4 تعليقات:

  1. مجرد يوم رمزي للتعبير عن الغضب
    وهو مثلا احنا ما بنفتكرش الام الا يوم 21 مارس؟

    ردحذف
  2. يوم الأم دى بتبقى مناسبه جميله وحلوه وبنت حلال يمكن تكون معموله اصلا علشان اللى ناسى والدته او حاجه .

    بس هو احنا محتاجين لمناسبه علشان نفتكر ان حال البلد مقلوب ولازم نعدله .

    واهو 6 إبريل فات اهو ايه حصل ؟؟؟ هنستنى لحد 6 إبريل الجاى علشان نقول البلد مقلوبه تانى

    ردحذف
  3. أولا حلو اوى الجمل بتاعة مواضيع التعبير دى..كنت فين انت أيام المدرسة...
    ندخل فى الجد بأه..الموضوع مش أن الناس ناسية بس الناس مستحمله و صابرة بس لما تلاقى الكل هيعترض ساعتها ما بتخافش و بضم صوتها لصوت باقى البشر...

    ردحذف
  4. الكلام ده جميل وكل كل حاجه
    بس كان يبقى كده فى الأضراب الأولانى اللى المحله أتكسرت فيه ده .
    علشان الناس كانت خايفه فعلا ولما صدقت يوم يبقى فيه فوضى وحاست ان محدش هيعرف يعملها حاجه .

    ولكن بعد كده وكأن شئ لم يكن والناس كلها هدت لحد قبل 6 إبريل السنه دى
    ناس كتيره اتكلمت بس اللى ملخظ الواحد ان الاضراب فشل بكل ما تحمله الكلمه من معنى والموسم راح .


    شكرا ليكى جدا ودايما منورانى كده

    ردحذف

ما يلفظ من قول إلا لديه رقيب عتيد