كلامى

الحلم اصله فكره , و الفكره اصلها خيال , و الخيال اصله أمل

السبت، 7 مارس، 2009

الشرطه فى خدمه طراطير الشعب




السلام عليكم
كل سنه و انتوا طيبين بمناسبه المولد النبوى الشريف
وكلنا اكيد جبنا حلاوة المولد ونقعد ناكل فيها لحد ما سننا تقع زى كل سنه .
والعيال كمان أكيد هتروح تجيب الطراطير اللى بتلمع دى وتلبسها
بس مش عااااااااااارف ليه
من وأنا لسه عيل صغير وأنا بكره حاجه اسمها طراطير وبحس اللى بيلبسها دى مش بيبقى راجل اوى يعنى .
وبكرها بكرها يعنى .
وبكره اللى بيبعوها كمان .
ناس غريبه كده تلاقى الواحد منهم لابس ميت طرطور على راسه وعمال يزمر ببتاعه كده ويزل العيال الصغيره علشان يشبطوا ويدبسوا اهلهم ويجيبولهم واحد .
وكل بياعين الطراطير دول ليهم صفه مشتركه ... ( لا لا طبعا غير الغتاته والرخامه )
العربيه اللى بيبقى عليها الطراطير دى .
عباره عن قفصان عيش مسروقه من الفرن اللى تحت بيتى وبشكل عجيب طالع ليهم 4 عجلات صغيره .

المهم النهارده نزلت اتمشى شويه فى الشوارع أنا وأصدقاء السوء .
لقيت بقدره قادر شارع كامل اتحول الرصيف بتاعه من رصيف ناس تمشى عليه لمصنع طراطير .
اه والله بجد ... بتاع 6 ستات وكام راجل كده فارشين على الرصيف وقاعدين يعملوا فى طراطير .
أنا أول ما شوفت كده قولت استر يا رب امال لما ادخل جوه البلد بقى هعمل أيه .
المهم و أنا ماشى كده ورايح على شارع البحر ( وشارع البحر ده اكبر شارع عندنا يعنى ) سمعت أن فيه حمله من بتوع المرافق دلوقتى وهتشيل كل الناس دى .
قولت أحمدك يا رب .
أخيرا هشوف الشارع ده من غير بياعين وبلالين ولا طرااااطير ويبقى منظر حضارى رائع .
قولت بقى اما ادخل اشوف الناس دى علشان أشمت فيهم شويه وهما بيتجابوا من قفاهم والحاجات دى تتصادر منهم .
وبعدين عادى اصلا دى عربيه بتنين جنيه الا تلت
وكام طرطور الخمسه بربع جنيه ..... يعنى اكيد الناس دى مش هتموت من الجوع لما دول يتاخدوا .
ودخلت الشارع ويا ريتنى ما دخلتوا .
لقيت كام عسكرى ولا شاويش ولا احتمال يكون مخبر متنكر فى هيئه امين شرطه .
أنا قولت بس دول نزلوا اهمت وبيشتغلوا بقى وهشوف الناس وهى بتبهدل بقى .
لقيت على حين فجأه الناس دى كل ما حد من العساكر دى يقرب منها شويه يقوم داخل شارع جانبى .
ومحدش من العساكر دول بيتكلم خالص وسايبنهم .
انا حسيت ان فى حاجه مش تمام فى الموضوع ... مش دى شرطه المرافق اللى اتعودنا عليها فقربت منهم بقى أشوف ايه الموضوع .

لقيت العساكر ولا الكام شاويش دول بيقولوا للناس دى ايه بقى : " يلا يلا قوم من هنا الحمله جايه دلوقتى , قومى يا بت لو العربيه جات وانتى لسه هنا وحياه مامتك ( مامتك دى انا بحاول ابقى مؤدب ) ما هتشوفى حاجتك دى تانى "

انا فضلت واقف متنح كده فى الشارع مش فاهم حاجه .
الله .. مش دول مرافق .. والجاين مرافق
ايه مش عايزين يسترزقوا ولا أيه ؟!
قام واحد من اصدقاء السوء اللى معايا قايلى : " أيه يا عم أصلهم واكلين قبل المولد كويس "
طبعا انا فهمته ورديت عليه قولت " فعلا الشرطه فى خدمه طراطير الشعب "

هناك 5 تعليقات:

  1. تصدق أن أنا اول مرة اعرف ان الناس بتجيب طراطير فى المولد..عامة احنا اتعودنا نبعد عن المضمون الاساسى و ندخل فى حاجات تانية..يعنى ايه علاقة الحلاوة و الطراطير بالمولد...
    الحاجة التانية فعلا الناس اللى بتبيع دى بتخلى الرصيف يختفى و بتشوه لمنظر..بس مش هى دى اكبر المشكلات...المشكلة الكبيرة بجد الظروف اللى خلت الناس دى تعمل كده...أنا بتهيألى أن أبسط حق لكل مواطن وظيفة كريمة..

    ردحذف
  2. تصدق انا وانا ماشية في شارع البحر يوم الخميس واحد من اللى بيكنسوا الشارع لقيته بيقولى كل سنة وانتى طيبة يا ابلة اي حاجة كده بقى وكل سنة وانتى طيبة استغربت اوى ماكنتش اعرف انهم بيستعدوا بدري كده بس كنت مسافرة بقى يوم المولد ما شوفتش الطراطير .. معلش يا محمود ما تركزش في اللي بيحصل علشان ما تتعبش .. بالمناسبة انت من منكوبي انهى كلية في جامعة طنطا ؟

    ردحذف
  3. روزى

    والله انا موافقك جدا .
    لو كل انسان له وظيفه محترمه مكنشى هيبقى فيه اى مشكله .
    بس ساعتها هنستورد الطراطير من الصين .. أنا بقول خلينا كده احسن .

    ميرسى جدا ليكى ويا رب تفضلى متابعه معايا على طول

    ردحذف
  4. سمو الأمير ساره

    المدونه نورت والله
    بس هو انتى ممكن مكنتيش تشوفى الطراطير حتى يوم المولد نفسه .
    شارع البحر ده بتاع المحله مش اللى فى طنطا :d
    وعندك حق فعلا الواحد مش لازم يركز فى المواضيع الصغيره دى خلينا فى المواضيع اللى ملحاش حل احسن .

    وأنا من منكوبى كليه الحقوق .. ولا حول ولا قوه الا بالله .

    ردحذف
  5. سيد محمود
    اسمح لي بالاعتراض معك و مناقشتك بشكل تفصيلي

    أول هام :
    واحد مسكين . . . غير متعلم . . . عنده بعض الوعي وقال انه مش هيسرق عشان ياكل عيش . . . مع إن السرقة بتأكل عيش حلو
    وقال انه مش هيشحت عشان ياكل عيش . . . مع ان الشحاته سهلة و تبجيب دخل حلو
    وقال انه مش هينصب على الناس لأن في ربنا موجود
    ولأن ربنا موجود وكلنا عبيده فربنا هياخد باله مننا ومحدش بيبات جعان

    الراجل المسكين دا قال انه هيشتغل شغلانة عشان يسترزق منها . . . هيعمل طراطير و يبيعها
    الراجل دا بيعيش الشهر كله بأقل من من100 جنيه

    شغلانة شريفة ومحترمة وترضي ربنا

    تاني هام :
    هل لأنك تكره شئ ما فهذا يعني عداوة له و تمني الشر و الخراب له ؟
    أنا بكره سواقين المكروباص . . بس دي ناس بتسترزق وتاكل عيش . . . بدعيلهم بالهداية

    تالت هام :
    يعني ايه منظزر حضاري . . . وعلى انهي مقياس بنيت الفكرة دي .؟ ؟ ؟
    مقياس اوروبي غربي
    يعني لازم كل حاجة يقولها الغرب نمشي وراها ؟؟

    رابع هام:
    فين قيم الاسلام ؟ ؟ ؟ العطف على المسكين , الرحمة , الاخوة في الاسلام ؟؟؟ احترام العمل الشريف

    اعتذر منك بشدة
    ولكنك تحتاج إلى تعديل نظرتك , و إلا تصبح على مستوى شخصي , ولكنك كأحد راغبي حضارة الامة الاسلامية , فلتكن على مستوى امتك
    مسلم حقيقي
    كما كان صحابة رسول الله
    خير خير خير
    محدش عارف الخير فين
    دمت سالما
    سلام عليكم

    ردحذف

ما يلفظ من قول إلا لديه رقيب عتيد