كلامى

الحلم اصله فكره , و الفكره اصلها خيال , و الخيال اصله أمل

الأربعاء، 25 فبراير 2009

القراءة للمعاقين .....!


كنت من كام يوم كده مع واحد صاحبى فى قهوه وكنت سالف منه كتاب وقولت أرجعهوله بقى ( صاحبى ده من نوع الناس اللى هما دودة قرايه ) .
المهم قعدنا وقلت أغلبه عشره طاوله بقى و احنا قاعدين لقيت الراجل اللى بينزلنا المشاريب مسك الكتاب اوى كده وبص على صاحبى ده وقاله " ماشى يا عم المثقف " طبعا أنا اخد الموضوع عادى فى الاول لان الناس دى بتحب تهزر مع الزباين ويمكن دى طريقه تهريجه .
لكن لقيت صاحبى بقى بصراحه مفروس من الكلام ده .
قالى الجمله دى انا طول عمرى بسمعها من الناس ولو فى يوم صدف ومشيت بكتاب فى الشارع كل واحد يقابلنى يمسك الكتاب يقلب فيه ويقولى " ماشى يا عم المثقف " والموضوع ده يا أبو نشأت خانقنى أوى .
ساعتها أنا بقى قعد أفكر هما ليه الناس دى بتعمل كده , هل يا ترى مثلا الأنسان اللى بيحب القرايه ده بيبقى حاله شاذه عن المجتمع .
الله دا اول كلمه فى القرآن الكريم " إقرأ " .. معنى كده إن القرايه من حرام .
آمال الناس بتبص لأى حد ماسك كتاب غير بتوع الدارسه أنه معوق ليه .
أفتكر بعد ما سيبت صاحبى ده بقى رحلتى الطويله مع القرايه واللى انتهت بحلول بعبع "الثانويه العامه " كفاكم الله شرها , انا فاكر انى كنت بحب أقرى وانا صغير وبحب القصص جدا ( طبعا اللى كانت بفهمها اياميها ) , بعد كده وفجأه لقيت ان ابقى ماسك كتاب فى ايدى غير كتب ومذكرات المدرسه شئ حراااام ... أيوه حرام ومن الأقوال المأثوره أياميها بقى " مذاكرنك أهم " " طيب افلح الأول فى مذكرتك وبعدين امسك الكتب دى " " فى الأجازه اقرى زى ما انتا عايز بس دلوقتى ركز علشان تبقى حاجه " ( وطبعا الاجازه لما بتيجى بيبقى اسبوع مصيف وبعديها نبدا الدورس بقى )
ولو الحجج خلصت هتلاقى أشهر كلمه قدامك اللى بجد تحسس الواحد أنه مش بنتى أدم وملهوش الا وظيفه واحده .. " يا تذاكر يا تنام "
وكمان افتكرت انى فضلت أربع سنين ممسكتش كتاب الا كتب الدراسه . لانى طبع مكنتش متحمس اوى يعنى علشان ارجع اقرى بعد 3 سنين القرايه حرام فيهم .
المهم سرحت بقى بخيالى بعيد كده بقى وفكرت أن لو فيه واحد حابب يبقى أديب مثلا أو يبقى شاعر أو يكتب قصص هتبقى أيه ظروفه ده بقى ؟
تخيلوا كده معايا لو راح لأبوه يقوله أنه بيحب الكتابه وكتب حاجه وعايز يطبع الكتاب بقى , هيبقى أيه تصرف أبوه بقى .
- صباح الخير يا حاج .
- صباح الخير يا اخويا انتا صحيت ؟
- ( لا بمشى وانا نايم ) أيوه يا بابا وصليت الصبح كمان .
- طيب يا سيدى ربنا يهدى .
- كنت عاوز اقولك على موضوع كده يا حاج .
- أوعى تقولى هات فلوس أنا يدوب ممشى البيت بالعافيه . لا تقولى هات جزمه ولا شورت ألعاب حتى .
- لا يا حاج دا الموضوع أكبر من الجزمه والحاجات دى .
- تبقى عملت مصيبه أتحفنى اطرب ودانى .
- أحم .. أنا عاوز انشر كتاب .
- طيب ما تنشر وأنا مالى أن شاء الله , لو البلكونه مش عجباك عندك السطح بس خلى بالك من الفراخ لتهرب .
- ( الاستهبال بدأ بقى ) لا يا حاج عاوز أطبع كتاب يعنى .
- والكتاب ده بتاع مين بقى أن شاء الله ؟
- بتاع مين أيه يا حاج أنا اللى مألفه .
- لا يا شيخ وهو أنتا بتعرف تالف ؟ وألفته امتى ده بقى ان شاء الله ؟ وألفته أزاى ؟
- انا بقالى يا حاج 3 سنين بكتب فى حاجات أخيرا جمعتها ونفسى أنشرها فى كتاب بقى , وبعيدن أنا مخلص فلوسى كلها أصلا على الكتب من وانا فى ثانوى .
- يعنى كمان سايب مذكرتك طول السنين ده وعمال تقرى فى كتب بره , والفلوس دى انتا مش بتشرب بيها سجاير .
- لا يا حاج والله ما جربتها حتى سجاير ايه بس .
- طيب ربنا يهديك يا ابنى . اكيد طبعا القرايه حاجه مهمه انا طول عمرى معودك على كده .
- ( لا يا راجل ) ايون ايون يا حاج طبعا , المهم بقى أنى عايز انشر بقى الكتاب بتاعى ده .
- طيب خلاص روح أنشره زى ما انتا عايز , وربنا يكرمك .
- ربنا يخليك يا حاج انا أن شاء الله هروح اتفق مع دار النشر النهارده . هى الفلوس هتبقى جاهزه امتى بقى يا حاج ؟ علشان يمكن اخلص كل حاجه النهارده .
- نعم يا حبيبى فلوس ايه ؟
- فلوس طبع الكتاب يا بابا .
- انا مش طول عمرى بقول ان الحاجات دى هتبوظك غور ياض من قدامى الساعه دى .
- يا حاج دا انتا اللى عملتنا ان القرايه مهمه اوى .
- مهمه اه بس مش جايبلى شويه حاجات تافهه وتقولى انشرها . انا مش قولتلك أمشى ياض .

ويمكن ساعتها البلكونه تتفتح وتلاقى ناس بتطير منها كده وقسم البوليس يسترزق .
طيب لو ده موقف الاب بقى تخيلوا انتوا بقى لو الولد ده راح يتجوز مثلا هيبقى ايه منظره . ( أنا عن نفسى مش عايز أتخيل ) .

والظاهر ان الموضوع ده مش جديد ولا حاجه وأنه قديم أوى .
بدليل حمله القراءة للجميع اللى ظهرت اصلا علشان تنبه الناس بأهميه القرايه .
بس انا بصراحه كل ما أفتكر القراءة للجميع دى أفتكر الكتاب اللى كنت واخده من إبن خالتى . الكتاب كان المفروض للأطفال .
الكتاب عباره عن قصه وكان عنوانه " عالم رائع جديد " والكاتب هو " الدوس هيكسلى " . والثمن مائه خمسه وسبعون قرش .
الكتاب ده كان عندى من وأنا فى ابتدائى ... قريته ومفهمتش حاجه خالص .
استنيت لحد ما بقيت فى اعدادى .. قريته ومفهمتش حاجه خالص برضوه . الله .. دا كان المفروض للأطفال .
لحد ما زهقت منه بصراحه وقولت ده فيه حاجه غلط .
لحد وانا فى تالته ثانوى بقى وكنت قاعد كده عند استاذ محمد محسن استاذ العربى ومستخبى لحسن ياحد باله منى ويسألنى ولا حاجه .
لقيته بيقول فى وسط الكلام " ومن رواد اليوجينيا الدوس هيكسلى " ... أيه ده دا الراجل بتاع الكتاب الغبى , قومت مركز كده بقى
عرفت ان ده درس قراءة عندنا فى المنهج و " اليوجينيا " دى حاجه زى التفرقه العنصريه وهى أن فيه فئه واحده بس من الناس اللى تستحق انها تعيش والباقى يخدموهم .. الله بقى دى زى النازيه تقريبا اصلا هى دى .
الراجل ده بتاع الكتاب من اهم روادها ... أفتكرت ان القصه كان فيها حضانات اطفال فى المستقبل وانهم بينقوا الصفات بتاع العيال دى .
يعنى كده القصه دى بتخدم اليوجينيا .. والقصه دى اطبعت فى حمله القراءه للجميع .. و للاطفال كمان . دا كده دى مصيبه .
أذا محدش بيعترف أن الانسان اللى بيحيب القرايه ده أنسان طبيعى على الاقل .
ولو حتى جهه اعترفت بده بتديله حاجات تخليه مش طبيعى .
ٌإذا وبكل فخر القراءة للمعاقين .

هناك 7 تعليقات:

  1. أزال المؤلف هذا التعليق.

    ردحذف
  2. بسم الله الرحمن الرحيم

    :D
    جميل اوي يا محمود والله
    بجد كلام جميل فعلا
    هي فعلا القراءة مش واخده حقها معانا ونادرا لما بتلاقي حد بيقراو تبقي حاجة غير فلاش وميكي
    الناس مش واخده بالها ان القراءة مهمه وان الواحد لازم يقرا عشان يبقي عنده خبرات ومعلومات تأهله لمواجه الحياه لكن محدش بيهتم رغم انهم هارونا في مناهج اللغه العربية دروس قراءة لكن محدش كان بيحبها

    بس علي فكرة رغم دخول التلفزيون والكمبيوتروالنت في حياتنا إلا ان في لسه ناس حرصه علي القراءة ومنهم صاحبك ده :D

    علي فكرة اسلوبك في الكتابه جميل اوي يعني لو حبيت تألف حاجة ممكن تكسب :D بس ابقي دور علي حد يمولك المشروع بقي

    شكرا يا محمودي بجد جامد جدا والله

    ومستنين الجديد كمان

    ردحذف
  3. محمود نشأت
    أنا موافقاك جدا فى الكلام ده..نظرة الناس للقراءة و اللى بيقرأ وحشة جدا فما بالك اللى بيكتبوا و تبقى كارثة لو شعر وقصص..هايتقالك أنت جاى من العصر الجاهلى و عاملى فيها أديب...
    ..............................
    ده عامة...بالنسبة بقى للطلبة فالكارثة بتبقى مضافة و بالذات ضحايا(طلبة) ثانوية عامة...المشكلة أن حتى الواحد لو ماحدش قالك ما تقراش مش هتبقى قادر تقرا برده لأنك بتوصل لمرحلة بتكره فيها شكل الكتب و الجرائد و كل ما هو مكتوب,....هو نظام تعليم غلط من أساسه....
    أخيرا بالنسبة لدرس اليوجينيا أنا فاكراة قوي..و كونه موجود فى حملة القراءة للجميع فى ده عادى..لأن كل شىء متوقع فى مصر ..هو حد فاضى يقرا و يراجع و الله يكون فى عون الجيل الجديد و فى عوننا..

    ردحذف
  4. بسم الله الرحمن الرحيم


    ههههههههههههههههههههههه

    بجد يا محمود انا مش قريت حاجه جميله كده من زمان

    نيجى للمهم بقى

    انت فكرتنى بطفولتى

    الحمد لله انا بكتب

    وافتكر ان فى مرحله اللى هى تقريبا نهاية الاعدادى وبدايةالثانوى


    كانت فترة ازدهار فكتاباتى

    بس بمناسبة موضوع النشر ده انا عملتها بالفعل

    بس على ادى بقى وانا صغيره فخامسه ابتدائى

    كتبت قصه كده ونسختها وبعتها بقى لماما وقرايبنا

    كنت عامله باين النسخهه بجنيه وربع هههههههههههه والله يا بلاش

    بس تعرف كانت ماما مشجعانى جدا عالقرايه وكانت دايما تشتريلى كتب وقصص وكده

    وتخلينى اقرى وقت محب

    بس بابا لاء خالص

    بس سبحان الله موضوع القرايه ده خلص لوحده مع الوقت

    النت احتل مكانه كبيره اوى

    بس بقيت بقرى عالنت

    بس بجد اللى ينوى انه يكتب فبلدنا دى هيتعب اوى

    ميرسى يا محمود على كتاباتك

    وطريقتك الرائعه

    ردحذف
  5. ساره

    فعلا القرايه هى اساس كل حاجه واكيد طبعا مهمه جدا
    والحمد لله ان البوست عجبك

    ردحذف
  6. Rosie

    هههههههههه طيب كويس ان فى حد لسه فاكر الدرس بتاع اليوجينيا ده .
    وربنا يستر عهلى الاجيال

    ميرسى جدا على تعلقيك

    ردحذف
  7. سما

    والله انتى محظوظه بجد بمامتك
    بس يا ريت تنمى الموهبه دى ومش تهمليها مدام عندك اللى بيشجعك

    ردحذف

ما يلفظ من قول إلا لديه رقيب عتيد