كلامى

الحلم اصله فكره , و الفكره اصلها خيال , و الخيال اصله أمل

الجمعة، 13 فبراير 2009

الأعتراف بالحق فضيحة ..!




بقالى فتره طويله بقول الجمله دى " الأعتراف بالحق فضيحه " وكنت بقولها بهدف التهريج والهزار بس مش اكتر .
قريب بس فكرت فى معناها .
... " الأعتراف بالحق فضيحه " ...
أيه ده تصورا بجد . هو فعلا ان الواحد يقول الحق بقت فضيحه دلوقتى ؟!
امال الحاج اللى قال أن " الاعتراف بالحق فضيله " ده كان ايه .
يمكن نظرته اللى على قده مصورتلهوش ان ممكن يجى ايام زى اللى احنا فيها دى .
يعنى ايه .. بجد خلاص معتشى الاعتراف بالحق فضيله وبقت فضيحه والسكوت عن الحق و انك تبقى قادر على التضليل هى دى الفضيله اللى بجد و المجتمع كله يحترم الإنسان علشانها .
علشان كده الناس المحترمه زادت أوى فى مجتمعنا ده .
بجد نفسى فى يوم الأقى مسؤل طالع على أى قناه فى التلفزيون ان شالله حتى موجة كوميدى ويقول يا جماعه أنا غلط فى الموضوع ده أو اللى بيحصل ده ناتج عن تقصير منى .
اعتقد بجد ساعتها الناس ممكن تحترم المسؤل ده هو اه قصر فى واجبه ومسؤليته بس اعترف بتقصيره ده وأكيد مدام اعترف هيحاول يتجنب الموضوع ده تانى .
ولو حتى الناس محترمتشى المسؤل ده اهو على الاقل خلص زمته قدام ربنا .
نفسى اسمع فى يوم ان عندنا مسؤل اتحرق دمه زى ما دمنا كل يوم بيتحرق وقرر أنه يستقيل بس علشان شاف نفسه مش فى أيده حاجه يعملها .
لكن الكلام ده ممكن يحصل فى حاله واحده باين كده وهو ان أنا اكون بحلم .
أكيد كلنا شوفنا "س . ح . م " وكمان حفظنا الأختصارات دى , وهى اختصارات لسكك حديد مصر الموقره .
واللى بصراحه بتوحشنا كل يوم ... لان طبعا بتقل كل يوم من كتير القطارات اللى بتنقلب .
والسيد وزير المواصلات اللى كل الناس فى كل البرامج بتاعت الوصله قالت عاوزين نشوف استقاله بقى
بس طبعا السيد الوزير معندوش وصله علشان كده معرفشى الكلام ده .

وبرضوه اكيد سمعنا عن اكياس الدم الملوثه وبرضوه نفس الناس بتوع الوصله دول قالوا عاوزين استقاله بقى .
لكن برضوه عادى جدا ولا أى حاجه حصلت .

واكيد برضوه سمعنا عن حاجات كتير اوى زى الاكل المسرطن اللى اكلناه وهضمناه وبالهنا والشفا .

عمرى ما شوفت مسؤل طلع وقال العيب منى يا جماعه ولا الغلط أنا السبب فيه .
طيب يا ترى بقى هو خايف يقول كده ليه .
يعنى ممكن مثلا حد يقول عليه مسؤل فاشل كل اللى جم قبله محدش فيهم غلط نص غلطه (طبعا كانوا شغالين بنفس المبدأ بتاع الاعتراف بالحق فضيحه ) .
ويبقى فعلا فضيحته بجلاجل وسيرته على كل لسان .. علشان معاليه غلط وقصر فى حاجه .
استغقر الله العظيم إنسان مين بس مبيغلطشى .

ٌإذا فبجد الاعتراف بالحق فــضــيـحه .

هناك 5 تعليقات:

  1. بسم الله الرحمن الرحيم

    الاعتراف بالحق فضيحه

    جميل العنوان ويشد اوى وعن نفسى اول مره اسمع الجمله دى

    تفتكر فعلا ان لو مسؤل طلع وقال انا غلطان

    هيطلع عشان ندمان

    معتقدش

    بتبقى لعبه جديده منه ده لو حصل ان حد طلع وقال كده اصلا

    المشكله مش بقت فالمسؤولين بس يا محمود

    من رايى ان اى ظاهره فالدنيا ولتكن ظاهرة عدم الاعتراف بالاخطاء دى ليها صغير وكبير

    صغير على مستوانا احنا وكبير على مستوى الدول لو بصيت حواليك هتلاقى كده

    وربنا قال " ان الله لا يغير ما بقوم حتى يغيرو ما بانفسهم "

    قولى كام نسبة ناس من اللى نعرفهم بيعترفو باخطائهم عشان نروح نزعل وناخد على خاطرنا اوى من الراجل المسؤل

    مش بقولك انه مش غلطان لاء طبعا

    بس احنا برضه سلبيين

    او على رايك المسؤول ده معندوش الوصله

    ردحذف
  2. أزال المؤلف هذا التعليق.

    ردحذف
  3. طيب وليه يا سما احنا منبدأشى بنفسنا
    ونبقا بنعمل ده وعندنا امل ان ممكن حد مننا يبقى مسؤل فى يوم ويعمل كده برضوه
    بس يا رب ساعتها بقى ميتغيرشى .......ز

    ردحذف
  4. اولا شكرا على تعليقك الجميل برافو عليك عنوان جذاب والموضوع حلو بس الواحد لو فكر فى تطبيقها فضيحة يبقى الفساد هوا اللى حيكسب و كده يبقى عملت لكل الفاسدين جميلة انا فى رأيى المتواضع الواحد يعمل اللى عليه ولا ينتظر الجزاء والله عمرى ما اشوف فساد واسكت ابدا المهم اعمل اللى فى استطاعتى وفى مجالى وبلاش اليأس لانه اكبر سلاح دلوقتى لتحطيم شباب العرب وشكرااا

    ردحذف
  5. فعلا معاكى حق فى كلامك
    أنا على فكره حاولت فى البوست انى اطلع الواقع بس مش اكتر لكن لقيت البوست فعلا فيه كميه يأس غريبه بس بصراحه مش عارف جات منين ...

    وانا معاكى جدا ان كل واحد لازم يبدأ من مجاله لو عاوزين حال البلد يتصلح بجد .

    وشكرا جدا على التعليق

    ردحذف

ما يلفظ من قول إلا لديه رقيب عتيد